लक्षवेध फाउंडेशन व जिल्हा परिषद नांदेड चा संयुक्त उपक्रम संपन्न होणार
नांदेड दिनांक 20: लक्ष्यवेध फाउंडेशन नांदेड आणि जिल्हा परिषद नांदेड यांच्या संयुक्त विद्यमाने 'भारत माझा देश आहे' हा वैचारिक उपक्रम लक्ष्यवेध या देशभक्ती आणि सामाजिक परिवर्तनासाठी स्थापित झालेल्या स्वयंसेवी संस्थेच्या उद्घाटनाप्रित्यर्थ दिनांक 25 एप्रिल रोजी आयोजित करण्यात आला आहे. या कार्यक्रमात नांदेड जिल्ह्यातील एक हजार मुख्याध्यापक आणि जिल्ह्यातील शिक्षण विभागातील तीनशे अधिकारी सहभागी होत आहे.
सर्व पाठ्यपुस्तकात पहिल्या प्रारंभीच्या पृष्ठावर 'भारत माझा देश आहे' ही प्रतिज्ञा प्रकाशित करण्यात आली आहे. आठ ओळी अथवा आशय असणाऱ्या या भारत माझा देश आहे या प्रतिज्ञात विद्यार्थ्यांवर राष्ट्रभक्तीचे कसदार संस्कार करण्यात आले आहेत. परंतु प्रतिज्ञा हा अभ्यासक्रमाचा भाग मानला जात नाही त्यामुळे विद्यार्थी प्रतिज्ञेच्या कसदार संस्कार आणि मानवी जीवन मूल्यांच्या शिकवणीपासून वंचित राहत आहेत. आज समाजात जातीभेद, धर्मभेद, विषमता या दुर्गुणांनी थैमान घातलेले आहे. शालेय जीवनात बालकांवर केलेले राष्ट्रभक्ती आणि मानवतेचे संस्कार आयुष्यभर अमीट राहतात. ही वस्तुस्थिती लक्षात घेऊन लक्ष्यवेध फाउंडेशन आणि नांदेड जिल्हा परिषदेच्या संयुक्त विद्यमाने कुसुम सभागृहात दिनांक 25 एप्रिल रोजी सकाळी 11 वाजता या कार्यक्रमाचे आयोजन करण्यात आले आहे. जिल्ह्यातील माध्यमिक व उच्च माध्यमिक शाळेचे मुख्याध्यापक आणि गटशिक्षणाधिकारी, शिक्षण विस्तार अधिकारी, केंद्रप्रमुख 'भारत माझा देश आहे' या प्रतिज्ञा प्रबोधन कार्यशाळेत सहभागी होत आहेत.
नांदेड जिल्ह्याचे जिल्हाधिकारी अभिजीत राऊत, मुख्य कार्यकारी अधिकारी वर्षा ठाकूर घुगे, पोलीस अधीक्षक श्रीकृष्ण कोकाटे, शिक्षणाधिकारी (माध्यमिक) प्रशांत दिग्रसकर, शिक्षणाधिकारी (प्राथमिक) डॉ. सविता बिरगे आदी अधिकारी 'प्रतिज्ञा' या प्रबोधन कार्यशाळेत सहभागी होत आहेत. माजी सनदी अधिकारी एकनाथ उर्फ अनिल मोरे यांच्या अध्यक्षतेखाली संपन्न होत असलेल्या या कार्यशाळेत प्रतिज्ञेच्या आठ ओळीतील आशय आणि अन्वयार्थ उपस्थित मुख्याध्यापक व क्षेत्रीय अधिकाऱ्यांना संबोध स्पष्ट करण्यात येणार आहे. या प्रतिज्ञा प्रबोधन कार्यशाळेत यदुनाथ थत्ते यांनी लिहिलेले प्रतिज्ञा पाठ्यपुस्तकातील हा ग्रंथ उपस्थित सर्व मुख्याध्यापकांना आणि क्षेत्रीय अधिकाऱ्यांना प्रदान करण्यात येणार असल्याची माहिती स्वागताध्यक्ष कामाजी पवार आणि पूर्व शिक्षण संचालक डॉ. गोविंद नांदेडे यांनी आमच्या प्रतिनिधीशी बोलताना दिली.
या कार्यक्रमात लक्ष्यवेधच्या उद्देशपत्रिकेचे वाचन शिवा कांबळे , सूत्रसंचालन इंजिनिअर शिवाजीराजे पाटील बाभळीकर आभार जगन शेळके हे मानणार आहेत. क्षेत्रीय अधिकारी आणि माध्यमिक व उच्च माध्यमिकचे मुख्याध्यापक/ प्राचार्य हाच प्रतिज्ञेचा अर्थ आणि आशय आपल्या शाळेतील विद्यार्थ्यांना समजावून सांगतील. हे प्रशिक्षीत मुख्याध्यापक आणि क्षेत्रीय अधिकारी शाळास्तरावर संवादी पद्धतीने प्रतिज्ञेचा अर्थ समजावून सांगतील. याच धर्तीवर नांदेड जिल्ह्यातील 16 तालुकास्तरावर अशाच प्रतिज्ञा प्रबोधन कार्यशाळा कार्यान्वित करण्यात येणार आहेत.
नांदेड जिल्ह्यातील खाजगी माध्यमिक व उच्च माध्यमिक शाळा / कनिष्ठ महाविद्यालयातील सर्व प्राचार्य आणि गटशिक्षणाधिकारी, शिक्षण विस्तार अधिकारी आणि केंद्रप्रमुखांनी 'भारत माझा देश आहे' या प्रतिज्ञा प्रबोधन कार्यशाळेस उपस्थित राहण्यास शिक्षणाधिकारी (माध्यमिक व प्राथमिक) यांनी एका आदेशीत केले आहे असून लक्ष्यवेध फाउंडेशनच्यावतीने फाउंडेशनचे सचिव डॉ हनुमंत भोपाळे, खजिनदार शिवाजीराव कपाळे व सहसचिव संगमेश्वर लांडगे यांनी प्रसिद्धी पत्रकाद्वारे आवाहन केले आहे.
आपल्या प्रतिक्रिया आमच्यासाठी महत्त्वपूर्ण आहेत .