आश्रमशाळेतील शिक्षकांच्या रिक्त पदासाठी उमेदवारांनी 31 ऑक्टोबरपर्यत ऑनलाईन अर्ज करण्याचे आवाहन..
नांदेड ( शालेय वृत्तसेवा ) :
प्रकल्प अधिकारी एकात्मिक आदिवासी विकास प्रकल्प किनवट कार्यालयाचे कार्यक्षेत्रातील आश्रमशाळेतील प्राथमिक शिक्षक, उच्च माध्यमिक शिक्षक ही पदे रिक्त भरावयाची आहेत. तरी पात्र उमेदवारांनी 31 ऑक्टोबर 2025 पर्यत https://mvgcompany.in या संकेतस्थळावर अर्ज करावेत, असे आवाहन सहायक जिल्हाधिकारी तथा प्रकल्प अधिकारी एकात्मिक आदिवासी विकास प्रकल्प किनवट यांनी केले आहे.
शासकीय आश्रमशाळेतील शिक्षकांची रिक्त पदे तात्पुरत्या स्वरुपात भरण्यासाठी बाह्यस्त्रोत संस्था मे. महाराष्ट्र विकास ग्रुप यांना आदेश दिला आहे. या संस्थेमार्फत अधिनस्त एकूण 16 शासकीय आश्रमशाळेवर नियुक्ती देण्यात आलेल्या शिक्षकांपैकी काही शिक्षक हे अद्याप शाळेवर हजर झालेले नाहीत. तेव्हा प्रकल्प कार्यालयाचे कार्यक्षेत्रातील रिक्त असलेल्या पदांवर ऑनलाईन अर्ज करण्याबाबत मे. महाराष्ट्र विकास ग्रुप यांचेकडून आवाहन करण्यात आले आहे.
उच्च माध्यमिक शिक्षक या पदासाठी एमए (अर्थ/समाज/मराठी/इंग्रजी) / एमएससी (मॅथ/फिजीक्स/केमेस्ट्री/बायो) आणि बीएड (कम्पलसरी) व TAIT स्कोअर. माध्यमिक शिक्षक या पदासाठी बीए/बीएससी (मराठी/इंग्रजी/विज्ञान/इतर) व बीएड. (अनिवार्य) आणि TAIT स्कोअर. प्राथमिक शिक्षक पदासाठी (मराठी) डीएड आणि टीईटी -1 /सीटीईटी-1 (अनिवार्य) आणि TAIT स्कोअर याप्रमाणे आहे. तरी उमेदवारांनी याची नोंद घ्यावी.
आपल्या प्रतिक्रिया आमच्यासाठी महत्त्वपूर्ण आहेत .