मराठी राजभाषा दिनानिमित्त मराठी साहित्याचे नवे संकेतस्थळ विकसित `साहित्यवेदी` संकेतस्थळाचे अनावरण ..
मराठी भाषामंत्री सुभाष देसाई यांच्या हस्ते सह्याद्री अतिथीगृहात करण्यात आले.
मुंबई ( शालेय वृत्तसेवा ) :
मराठी भाषा दिनाचे औचित्य साधून चार उच्च माध्यमिक अध्यापकांच्या संकल्पनेतून विकसित केलेल्या `साहित्यवेदी` या संकेतस्थळाचे मराठी भाषामंत्री सुभाष देसाई यांच्या हस्ते झाले. डॉ. सुजाता शेणई, शीतल सामंत, डॉ. पांडुरंग कंद व नानासाहेब जामदार या पाठ्यपुस्तक अभ्यासगट सदस्यांनी हे संकेतस्थळ तयार केले आहे.
मराठी भाषेचा आजपर्यंतचा प्रवास , कोशसंपदा , सुलेखनकला व्यवसाय , युवा साहित्यकार आढावा, सर्व वाङमयीन नियतकालिकांची ओळख व कार्य , महाराष्ट्र बोलींचे नमुने व परिचय , महाराष्ट्रातील शताब्दी ग्रंथालयांचे एकत्रित दालन , अनेक साहित्यकारांच्या निवासभेटीची परिक्रमा अशा अनोख्या विषयांनी साहित्याचा यज्ञ संपन्न करण्यासाठी सज्ज 'साहित्यवेदी' असलेले हे पहिलेच व नावीन्यपूर्ण असे संकेतस्थळ आहे. यावेळी बोलतांना माननीय भाषामंत्री सुभाष देसाई म्हणाले, “ साहित्यवेदी या संकेतस्थळामुळे मराठी भाषा व साहित्य यांची सर्व अंगे एकत्रित मिळतील. तंत्रज्ञानाच्या साहाय्याने मराठीतील ज्ञान सर्वांपर्यंत पोहोचवणे व जगातील सर्व मराठी भाषकांना जोडणे यामुळे शक्य होईल. मंत्रालयातर्फे जागतिक मंच तयार केला जात आहे, त्याच्याशी हे संकेतस्थळ जोडून घेता येईल. ”
हे संकेतस्थळ शालेय स्तर ते संशोधक-अभ्यासक यांच्यासाठी उपयुक्त होणार आहे. मराठी भाषा आणि साहित्याला उज्ज्वल परंपरा आहे. एक दिवस भाषादिन साजरा करून त्याचे महत्त्व अधोरेखित करण्यापेक्षा वर्षभर ते सतत दृष्टिक्षेपात राहावे, या हेतूने www.sahityavedi.com या संकेतस्थळाची निर्मिती करण्यात आली. मराठी भाषेविषयीचे डॉ. गणेश देवी, डॉ. नीलिमा गुंडी, हरी नरके, डॉ. विद्या देवधर यांच्यासह अनेकांचे अभ्यासपूर्ण लेख तसेच विविध विषयांचा अंतर्भाव दृक्-श्राव्य फितींसह यात केला आहे. मराठी भाषेचे जतन व संवर्धन करण्यासाठी अध्यापकांनी केलेला हा स्तुत्य उपक्रम आहे.
आपल्या प्रतिक्रिया आमच्यासाठी महत्त्वपूर्ण आहेत .