शिक्षण संचालक दिनकर टेमकर यांना पुरोगामी शिक्षक संघटनेचे निवेदन
नांदेड ( एस. एस. पाटील ) :
बालकाचा मोफत व सक्तीच्या शिक्षणाचा अधिकार कायद्यान्वये सर्व प्राथमिक शाळांना इ.5वी चा वर्ग जोडण्याचा शासनाने घेतलेल्या निर्णयाची काटेकोरपणे अंमलबजावणी करावी व राज्यातील सर्व उच्च प्राथमिक शाळांना इ. 8वी चाही वर्ग जोडावेत अशी मागणी महाराष्ट्र पुरोगामी प्राथमिक शिक्षक संघटनेने राज्याचे शिक्षण संचालक दिनकर टेमकर यांचेकडे नुकतीच निवेदनाद्वारे केली आहे.
संघटनेचे राज्य नेते विजय भोगेकर व राज्याध्यक्ष प्रसाद पाटील यांचे नेतृत्वाखाली दिलेल्या निवेदनात इ.1ली ते 5 वी च्या वर्गासाठी 60 पटापर्यंत 2 शिक्षक मंजूर असून एका शिक्षकाला तीन वर्गाचे अध्यापन करावे लागत आहे आणि एका शिक्षकाने 3-3 वर्गाचे अध्यापन करणे शास्त्रीय दृष्ट्या योग्य नसल्याने इ.1 ते 5 च्या वर्गांना 60 पर्यंत किमान 3 पदे मंजूर व्हावीत, शिक्षण विभागातील सर्व रिक्त पदे भरावीत, विज्ञान विषय शिक्षक पदोन्नती फक्त कार्यरत पात्र प्राथमिक शिक्षकांमधूनच व्हावी, सर्व उच्च प्राथमिक शाळांना मुख्याध्यापक पद मंजूर व्हावे.
राज्यातील जिल्हा परिषद प्राथमिक शिक्षकांमधूनच केंद्र प्रमुख पदोन्नती 50% पदे व परिक्षेद्वारा 50% पदे प्राथमिक शिक्षकांमधूनच भरावीत, शिक्षकांचे अनियमित होणारे वेतन सी एम पी प्रणालीद्वारे व्हावे, समान काम समान वेतन नुसार 100% विषय शिक्षकांना वेतनश्रेणी मिळावी, 1 जानेवारी 2016 नंतर चटोपाध्याय लागू झालेल्या अध्यापक व पदवीधर शिक्षकांच्या वेतनत्रुटी दूर करावी, जिल्हा परिषद शाळांना शिक्षकेत्तर पद मंजूर करणे, सर्वच मुलींना दररोज किमान 10 रू. उपस्थिती भत्ता मिळावा, नगर पालिका मनपा शाळांना पूर्ण वेतन अनुदान मिळावे आदी मागण्यांबाबत सकारात्मक चर्चा झाली.
यावेळी संघटनेचे राज्य नेते विजय भोगेकर, राज्याध्यक्ष प्रसाद पाटील, यांचेसह सरचिटणीस हरीश ससनकर, महिला राज्याध्यक्ष अल्का ठाकरे, राज्य उपाध्यक्ष जी.एस.मंगनाळे, राज्य संघटक पी.आर.पाटील, कोल्हापूर जिल्हा पदाधिकारी एस.के.पाटील, चंद्रपूर जिल्हाध्यक्ष नारायण कांबळे, बाबुराव माडगे, सुनीता इटनकर, अशोक खाडे, अरुण चौधरी आदी उपस्थित होते.अशी माहिती राज्य कोषाध्यक्ष बालाजी पांडागळे ,जिल्हा प्रसिद्धी तथा माहूर तालुका अध्यक्ष एस.एस.पाटील यांनी दिली.
आपल्या प्रतिक्रिया आमच्यासाठी महत्त्वपूर्ण आहेत .