दहीवेल : दि 25 नोव्हेंबर रोजी धनेर आणि दहीवेल संयुक्त बिट स्तरीय शिक्षण परिषद संपन्न झाली. दहीवेल शिक्षण सोसायटी संचलित कै.दे. सो.पाटील माध्यमिक व उच्च माध्यमिक विद्यालय व कन्या विद्यालय एमसीवीसी जुनियर कॉलेज दहिवेल येथे ह्या शिक्षण परिषदे चे आयोजन करण्यात आले होते.नवीन राष्ट्रीय शैक्षणिक धोरणानुसार शिक्षण क्षेत्रातील सुधारित बदल अध्यापनाचे नवीन क्षेत्र ,तंत्र पद्धती , अध्ययन अध्यापनाचे पुढील समस्या दूर होण्याच्या साठी आवश्यक उपाययोजना, शिक्षकांच्या अडचणी, शाळांच्या समस्या प्रशासकीय धोरणात्मक बाबी आदी विषयावर सांगोपांग चर्चा व्हावी, विचार मंथन व्हावे यासाठी या शिक्षण परिषदेचे आयोजन करण्यात आले होते.
शिक्षण परिषद सनियंत्रक श्रीम. पियुषा पाटील यांच्या शुभ हस्ते विद्यादेवी माता शारदेचे पुष्प हार अर्पण करून प्रतिमा पुजन करण्यात आले.बोडकीखडी चे केंद्रप्रमुख श्री शरद देवरे यांनी परिपाठ झाल्या नंतर सम्पुर्ण दिवसाचे तासिका निहाय नियोजन याबाबत उपस्थित सर्व शिक्षकानां अवगत केले.परिषदेच्या सुरुवातीला मागील शिक्षण परिषदेचा आढावा घेण्यात आला यावेळी घोडदे केंद्रा च्या केंद्रप्रमुख श्रीमती पाटील यांनी विविध शैक्षणिक बाबीचे अनुधावन घेतले. शिक्षण परिषद दरम्यान भेट देवुन गटशिक्षणधिकारी श्री राजेंद्र पगारे यांनी उपस्थित सर्व शिक्षक बांधवाच्या शैक्षणिक कामकाजा बाबत च्या समस्या जाणून घेतल्या.
यावेळी गटशिक्षणअधिकारी यांनी संबोधित करताना शिक्षकांनी आपले ज्ञान अद्ययावत ठेवण्यासाठी दररोज नियमितपणे वाचन करावे , नवीनतम शैक्षणिक प्रवाह यांचा परिचय करून घ्यावा तसेच अध्ययन अध्यापनात परिणाम कारकता आणण्यासाठी, प्रभावी होण्यासाठी नवीन बदल स्वीकारले पाहिजेत तसेच विद्यार्थ्यांना शाळा स्तरावर विविध स्पर्धा परीक्षेला बसवणे, स्पर्धा परीक्षेची तयारी करून घेणे, विद्यार्थ्यांचा सर्वांगीण गुणवत्ता विकास कसा होईल याकडे लक्ष देणे यासाठी देखील शिक्षकांनी मनापासून प्रयत्न करावेत , शिक्षकांनी नियमित पुस्तकांचे वाचन केले पाहिजे तसेच मोबाईल वापर संयमपूर्वक करावा, शैक्षणिक अगदी अनिवार्य बाबींसाठीच मोबाईलचा वापर करावा इतर वेळ हा विद्यार्थी हितासाठी आणि विद्यार्थी अध्ययन अध्यापनसाठी वापरला पाहिजे, आपल्या पुढील विद्यार्थी हे दैवत म्हणून त्या विद्यार्थ्यांना इयत्ता निहाय स्तरनिहाय आवश्यक क्षमता उद्दिष्टे प्राप्त करून देण्याचे अत्यंत मोलाचे कार्य हे शिक्षकांनी करणे आवश्यक असून शिक्षकांवरच ही फार मोठी जबाबदारी शासनाने आणि समाजाने सोपवलेली आहे तरी शिक्षकांनी आपल्या कर्तव्यापूर्वती प्रामाणिक राहून हे काम केले पाहिजे अशा शब्दांत मार्गदर्शन केले.
शिक्षण परिषदेत खालील प्रमाणे वेगवेगळ्या विषयांवर सर्वंकष चर्चा व विचारमंथन करण्यात आले. बिट अतंर्गत कार्यरत विविध शाळेतील शिक्षकांनी सुलभकाची भूमिका पार पाडली.यापैकी मुख्यमंत्री समृद्ध पंचायत राज अभियान, मुख्यमंत्री माझी शाळा सुंदर शाळा अभियान टप्पा क्र 3 - श्री प्रवीण बहिरम, पॅट चाचणी विश्लेषण, स्व- अभिव्यक्ती - श्री.निलेश ठोके, समग्र प्रगती पत्रक, डॉक्टर जयंत नारळीकर गणित व विज्ञान समृद्धी कार्यक्रम या अंतर्गत विद्यार्थी खाते नोंद बाबत - श्री एच आर पाटील, विद्यार्थी नोंदणी तसेच समुह समुदाय सहभाग , एसएमसी समिती स्थापन, त्रिभाषा सूत्रे आधारित शिक्षण प्रणाली चा सांप्रत शिक्षण प्रवाहात समावेश - एल सि बागुल, शिष्यवृत्ती परीक्षा तयारी व बुद्धिमत्ता विषय- एच जे गायकवाड, मुख्यमंत्री समृद्ध पंचायत राज अभियानांतर्गत प्राथमिक शाळा गुणवत्ता विकासात विकासाचे विविध निकषांचे पूर्तता तसेच मुख्यमंत्री माझी शाळा सुंदर शाळा या कार्यक्रमाच्या अभियांतर्गत विविध निकषांची माहिती व गुण विभागणी , शाळा व्यवस्थापण समिती- श्री.राहुल चौरे तसेच निपुण उत्सव कार्यक्रम, ऑनलाईन उपस्थिती , यु-डायस ,अपार आय डी, माजी विद्यार्थी संघ यासारख्या विविध शैक्षणिक विषयावर प्रकाश टाकण्यात आला तसेच गटकार्य सादरीकरण करण्यात आले. या प्रसंगी एस एम एफ तालुकासमन्वयक श्री राजेंद्र पगारे यांनीही उपस्थित शिक्षकानां मूल्यवर्धन उपक्रम प्रभावी पणे राबविणे बाबत आवाहन केले.शेवटी वंदे मातरम राष्ट्रगीताने शिक्षण परिषदेची सांगता झाली.
आपल्या प्रतिक्रिया आमच्यासाठी महत्त्वपूर्ण आहेत .