मुंबई (विशेष प्रतिनिधी उदय नरे ) :
खाजगी अनुदानित शाळांमधील कारभारात पारदर्शकता आणण्यासाठी महाराष्ट्र राज्य शिक्षण संचालनालयाने एक महत्त्वपूर्ण पाऊल उचलले आहे. राज्यातील सर्व अनुदानित शाळांमधील शिक्षक आणि शिक्षकेत्तर कर्मचाऱ्यांची संपूर्ण माहिती आता 'शालार्थ' प्रणालीवर सार्वजनिक करण्यात येणार आहे. माहिती अधिकार अधिनियम, २००५ च्या तरतुदींनुसार हा निर्णय घेण्यात आला असून, यामुळे शिक्षण क्षेत्रातील पारदर्शकता वाढण्यास मदत होणार आहे.
नेमकी काय माहिती उपलब्ध होणार?
शिक्षण संचालक (माध्यमिक व उच्च माध्यमिक) डॉ. महेश पालकर यांनी जारी केलेल्या परिपत्रकानुसार, कर्मचाऱ्यांची खालील माहिती अधिकृत संकेतस्थळावर प्रसिद्ध केली जाईल:
कर्मचाऱ्याचे नाव आणि पदनाम.
संस्थेचे व शाळेचे नाव.
सेवेत रुजू झाल्याचा दिनांक.
सेवानिवृत्तीचा महिना व वर्ष.
मिळणारे एकूण वेतन.
'शालार्थ' प्रणालीवर होणार प्रसिद्ध
ही सर्व माहिती https://shalarth.maharashtra.gov.in या संकेतस्थळावर उपलब्ध करून दिली जाणार आहे. या प्रक्रियेसाठी आवश्यक तांत्रिक बदल करण्याचे निर्देश महाआयटीच्या बिझनेस अनालिस्टना देण्यात आले आहेत.
पारदर्शकतेसाठी उचललेले पाऊल
अनेकदा अनुदानित शाळांमधील पदभरती आणि वेतनाबाबत तक्रारी प्राप्त होत असतात. ही माहिती सार्वजनिक झाल्यामुळे सामान्य नागरिकांना आणि संबंधित घटकांना एका क्लिकवर अधिकृत माहिती उपलब्ध होईल. शिक्षण विभागाने ४ मार्च २०२६ रोजी हे आदेश निर्गमित केले असून, याची अंमलबजावणी तातडीने करण्याचे निर्देश विभागीय शिक्षण उपसंचालक आणि शिक्षणाधिकाऱ्यांना देण्यात आले आहेत.
आपल्या प्रतिक्रिया आमच्यासाठी महत्त्वपूर्ण आहेत .